Association Malienne des Expulsés

Accueil > Revue de Presse > Maliden 163 seginna so ka bɔ Libi jamana na
Maliden 163 seginna so ka bɔ Libi jamana na

(nin bɔra "Kibaru" bɔko 542nan, marisikalo, san 2017)

An bɛ don min na, halibi gɛlɛya dantɛmɛ bɛ Libi jamana kan ; fanga min lakodɔnnen don diɲɛ tɔnba fɛ, o ni mɔgɔ murutilenw ni ɲɔgɔn cɛ gɛlɛyaw bɛ ka caman fara a dansagonkokɛw kan. O kɔlɔlɔ sɛbɛkɔrɔ yɛlɛnnen don dunanw na ;
fo alamisadon, marisikalo tile 2, san 2017, Maliden 163 wɛrɛ ye Libi jamana bila ka segin so. U bisimilala Bamakɔ-Senu, Modibo Keyita tɔgɔlapankurunjiginkɛnɛ na. Musow ni denmisɛnnin caman b’u la, a dɔw yɛrɛ banabaatɔ tun don.

Nin Maliden minnu fana nanen filɛ ka bɔ Libi, a dɔw y’a jira k’olu tun bɛ minɛkojuguya dan bɛɛ la. Ko u tun b’u jɔnyaminɛ ; hali n’u banana u tɛ furakɛ. Denmisɛn caman tun ye Libi lasɔrɔ ni Erɔpu gun donni ŋaniya ye. Tɔw kɔni tun bɛ baara la Libi yen ka to k’u somɔgɔw bolomagɛn Mali kɔnɔ.

Libi faamaw mana dunan minnu minɛ, u b’u datugu kaso la. U ta ye gɛlɛya suguya bɛɛ ye yen. O de kosɔn, u caman bɛ k’a ɲini Mali gɔfɛrɛnaman fɛ, a ka fɛɛrɛw tigɛ k’u lasegin faso kɔnɔ.

Mariyamu F. Jabate / Dɔkala Yusufu Jara

vendredi 21 avril 2017

SPIP | contacter L'AME | Se connecter | Plan du site | Suivre la vie du site RSS 2.0

Siège : Djélibougou, route de Koulikoro, Immeuble N’Fa Fofana, Près de l’ex. Oumou-Sang (actuel Nissan Automobile)
Tél. (00 223) 20 24 11 22 * 66 78 21 11 * 71 00 30 00 * 76 37 82 46
Boite Postale 9155 Bamako Mali
Email : contact@expulsesmaliens.info
 Localisez-nous : Cliquez ici