Association Malienne des Expulsés

Accueil > Revue de Presse > Maliden 129 gɛnna ka bɔ Gabɔn jamana kan
Maliden 129 gɛnna ka bɔ Gabɔn jamana kan

Kibaru bɔko 523nan, utikalo 2015

Taamako cakɛda min bɛ wele « Dɛnba taransipɔri », o kareba fila falen sera lakanabaaw ka cakɛda la Sogoninko-Bamakɔ, tarata don utikalo tile 11 san 2015, sɔgɔmadanɛgɛ kanɲɛ 6 waati la. Maliden 129 minnu gɛnna ka bɔ Gabɔn jamana kan, olu de tun b’a kɔnɔ. U bisimilala kɔkanmalidenw ka minisiriso ka ciden Madamu Sidibe Hawa Hayidara ani hadamadenya yiriwali ɲɛmɔgɔba kuntigi Modibo Jalo fɛ.

Denmisɛn gɛnnen ninnu kɛra baton kɔnɔ utikalo tile 7 ka na Nizeriya « Denba taransipɔri » de y’u doni ka Burukina cɛci n’u ye fo Bamakɔ ka bɛn ni utikalo tile 11 sɔgɔmada ye.

Sɛkinɛ Daramɛ ye mɔgɔ gɛnnen ninnu ka kumalase la ye. Ale y’a jira ko sɛbɛn min bɛ wele tubabukan na sezuru, n’a bɛ dunan yamaruya a ka to Gabɔn dugukolo kan, k’u gɛnna k’o t’u bolo.

Kasɔrɔ o sɛbɛn in dilanni jɔra jamana kɔnɔ a bɛ san fila bɔ bi. A bɛ se ka kɛ dilanni dabilali dabɔra dunan minnu bɛ jamana kɔnɔ n’o tɛ olu bolo, k’olu gɛn. N’o tɛ mɔgɔ kuraw b’a la ka don ; nka olu bɛ wajibiya ka wiza ta yanni u ka don. O b’a to u ka se k’u ka baara kɛ u fɛrɛ ma.

Sɛkinɛ Daramɛ ka fɔ la, olu tun t’u gɛnkun dɔn.

Sezuru sarati mana dafa, i bɛ taa a falen, nka o musaka ye sefawari d 30.000 ye. Dɔ fana tun b’o sɛbɛn lankolonw dilan ka feere dunanw ma. O ɲɛdɔnnen, sezuru dilanni dabilala. Kɔsa in na, Gabɔn faamaw ye sezuruko sɛgɛsɛgɛli wuli ka jɔ. Gofɛrɛnaman ye sariya ta o kɔfɛ, k’a jira ko sezuru tɛ dunan fɛn o fɛn bolo, k’o gɛn ka bɔ Gabɔ, jamana kan. Kasɔrɔ fɔlɔ n’u tun y’i minɛ, sezuru sarati dafalen walima tun t’i bolo, i tun bɛ sefawari d .400 walima d .1000 sara surɔfɛn ye.

Mɔgɔ nanenw ka fɔ la, sezuruntan tɛ Afiriki tilebinyanfan mɔgɔw dɔrɔn ye. Nka olu de fɔlɔ bɛ ka gɛn sisan. Mohamɛdi Samasa bɛ nin mɔgɔ 129 gɛnnenw na. Ale y’o jira k’u dɔw ye kalo 6 kɛ kaso la yann’u ka se u gɛnni ma ; dɔw ye tile 20 sɔrɔ o la. U ye gofɛrɛnaman fo k’a waleɲumandɔn u laseli la jamana kɔnɔ. U labanna ko kankari kelen da denmisɛn tɔw ye minnu hami ye tungafɛtaa ye. U k’a to u hakili la ko ko bɛɛ bɛ tungafɛtaa la.

O siratigɛ la Madamu Sidibe Hawa Hayidara walasa ka nin mɔgɔ gɛnnenw ka kankarimadakan sɛmɛntiya, a ko mɔgɔ o mɔgɔ n’i ma ɲɛ tungafɛtaa kɔ, a ɲuman ye k’i taayɔrɔ sariyaw ɲini k’u dɔn, k’i ka labɛnw k’o kan.

F Nafo, Dɔkala Yusufu Jara

jeudi 27 août 2015

SPIP | contacter L'AME | Se connecter | Plan du site | Suivre la vie du site RSS 2.0

Siège : Doumanzana, rue 210, Porte 169, route de Nafadji
Tél. (00 223) 66 78 21 11 * 71 00 30 00 * 76 37 82 46 * 79 12 10 39
Boite Postale 9155 Bamako
Email : contact@expulsesmaliens.info