Kɔkanma denw kunko ɲɛnabɔli minisiriso bɛ wulikajɔ suguya bɛɛ la walasa ka nɔgɔya don Malidenw dabolo jugu la jamana kɔkan. O de kosɔn Maliden 146 minnu minɛna Libi jamana kan yen faamaw fɛ k’u b’u gɛn, kɔkanmalidenw kunko ɲɛnabɔli minisiriso nana n’u ye Bamakɔ sibiridon marisikalo tile 26 san 2016. Gɔfɛrɛnaman tun ye pankurun kelen bila a ka bolo kan o kama.

Tuma min na u sera Bamakɔ, u kunbɛnna hadamadenya yiriwal lakana cakɛda (sapɛri pɔnpiye) ani kɔkanmalidenw kunko ɲɛnabɔjɛkulu ka cidenw fɛ. O mɔgɔ 146 minnu nana, musow ni denmisɛnninw b’u la. Mɔgɔw yɛrɛ b’u la minnu tɛmɛtɔ tun don ka taa Erɔpu gun kan. Nka jama fanba tun bɛ baarala Libi jamana kan yen. U minɛnen yanni taa ka k’u nɔfɛ ka na Mali kɔnɔ, u ladoncogo tun ka jugu kosɛbɛ.

O siratigɛ la, u y’a ɲini kɔkan malidenw minisiriso fɛ, Maliden tɔ minnu b’olu kɔ yen, u ka dabali tigɛ u fana laseli la jamana kɔnɔ, sabula k’a fanba tɛ dabolo ɲuman kan. U y’a jira ko Libi ka gɛlɛn bi, o ye gɛlɛya dan ye.

Kabini kɛlɛ wulila yen ka Mohamari Kadafi faga san 2011, binkannikɛlaw bɛ ka dankari dunanw na sanga ni waati bɛɛ la.

Kɔkanmalidenw kunko ɲɛnabɔli minisiriso fana ye lahidu ta, ko n’a ma dɛsɛ, Maliden tɔ minnu bɛ yen n’u b’a fɛ ka segin jamana kɔnɔ, a bɛ dabali tigɛ u nani na. Sabula kabini a y’o baara in daminɛ san 2015, a sera ka na ni mɔgɔ 554 ye ka bɔ Libi jamana na. A siɲɛ fɔlɔ tun ye mɔgɔ 180 ye, filanan mɔgɔ 170, sabanan mɔgɔ 58 ; naaninanmin filɛ nin ye, o kɛra mɔgɔ 146 ye.

Dɔkala Yusufu Jara
Kibaru n°531, Awirilikalo 2016, ɲɛ 8

O bɔko kelen kɔnɔ, ɲɛ 4 :

Tungafɛtaa gɛlɛya tɛ fɔ ka kan.

O tɛmɛnen kɔfɛ, ne b’a jira jamanadenw na, ko tungafɛtaa ka gɛlɛn, o ye gɛlɛya dan ye. A tɛ se ka fɔ ka ban. Taamasira janya, cɛncɛn ni kɔgɔji, kɔngɔ ni minnɔgɔ, binkanniw, siyɔrɔ jugu, baarasɔrɔbaliya ani faamajuguw, nin bɛɛ de bɛ tungafɛtaa gɛlɛyaw la.

O hukumu kɔnɔ, ne b’a ɲini jamana ɲɛmɔgɔw fɛ, u ka dabali ɲuman tigɛ tungafɛtaalaw kunko bɛ se ka nɔgɔya cogo min na. Ne ma deli ka bɔ jamana kɔkan, nka n y’a mɛn, ko ni tungafɛtaalaw minɛna jamana dɔw kan, k’u b’u kɛ ɲɔgɔn kan kaso la i n’a fɔ baganw, ka laban k’u gɛn ka na u ka jamanaw kan. Hali minnu mɛɛnna yen, olu t’u bolofɛnw tali masɔrɔ ka na n’o ye.

An bɛɛ ka jɛ k’an fanga fara ɲɔgɔn kan, ka fura ɲini tungafɛtaa gɛlɛya la ; sabula ne ɲɛ t’a dabilacogo la. Ala ye dugukolo da k’a fɛnsɛn an k’an dahirimɛ ɲini a kan fan bɛɛ fɛ. An se tɛ gɛnni in na ; nka ni minnu gɛnna k’u bɛ bila ka na, Ala ka se n’u ɲuman ye jamana kɔnɔ.

Aba Bari

ka bɔ Banga, Sibilakomini na Sinsanin, Segu mara la