Association Malienne des Expulsés

Accueil > Revue de Presse > Maliden 8 fagara, Togo jamanakuntigisigi kalata kɔfɛ
Maliden 8 fagara, Togo jamanakuntigisigi kalata kɔfɛ

Mali kɛtɔ ka sangafosɛbɛn kɛ ka ɲɛsin maliden minnu fagara Togo jamana na murutili dɔ senfɛ, jamana ɲɛmɔgɔw y’a wajibiya Togo faamaw ma, damatɛmɛwale in kɛbaaw ka ɲini k’u kiiri. Jamanakuntigi ye Mali jagoko n’a izinikow minisiri Sogɛli Kokala Mayiga ci ka taa a ko jula Togo. Maliden minnu bɛ yen, dabali tigɛra olu ka segin so. O hukumu kɔnɔ, ntɛnɛndon mɔgɔ 14 seginna Mali la, muso 7 b’olu la.

Mɔgɔ minnu fagara Togo murutili in senfɛ, olu somɔgɔw don. Malidenw ka tɔn min sigilen don Lome, o kɔrɔsigi n’o ye Idirisa Tarawele ye, o ka fɔ la, tuma min na Lome duguden dɔw wulila ka taa bin an ka fasodenw kan, olu bolila ka taa u yɛrɛ kalifa Dakuwame kintigi la. O si la, u ma sɔn ka bɔ u kɔ. Mɔgɔ murutilen ninnu nana a jira kintigi la, Mamadu Sidibe min b’a ka kalifaw cɛla n’a bɛ wele Papu, ni kintigi m’o bɔ ka di u ma, u b’a faga. Bagabagali in kɛtɔ sɛbɛ ye, kintigi seko ma ye Papu labilali la. U ɲɛ da Papu kan, u y’u suuru a kan. O furancɛ la, kintigi somɔgɔw ye maliden tɔw dɛmɛ k’u bɔ kogo kɔfɛ.

Gɛlɛya min ye malidenw sɔrɔ Togo, a ɲɔgɔnna dara jamana wɛrɛ mɔgɔw fana kan yen.

Mali ka lasigiden min bɛ Togo, n’o ye Mahamadu Bɛni Labati ye, o ni Sogɛli Kokala Mayiga jɛra ka lajɛ kɛ ni Togo malidenw ye. U y’a gɛlɛya bɛɛ kelenna ma, u k’u jilaja u sigiyɔrɔ sariyaw labatoli la. Minisiri min ɲɛsinnen don Mali kɔkankow ni Farafinna kelenya ma, n’o ye Umaru Hamadunu Dikɔ ye, o y’a sɛmɛntiya ko ni nin gɛrɛgɛrɛ in tɛ, gɛrɛntɛ wɛrɛ tun tɛ malidenw dala Togo jamana kan yen ; wulikajɔw kɔni bɛ senna waleya jugu in kɛbaaw nɔfɛ. N’o tɛ, maliden tɔw naniko ma boloda jamana kɔnɔ.

Solo Dunbiya, Dɔkala Yusufu Jara

Kibaru n°400, mɛkalo san 2005

dimanche 1er mai 2005

SPIP | contacter L'AME | Se connecter | Plan du site | Suivre la vie du site RSS 2.0

Siège : Djélibougou, route de Koulikoro, Immeuble N’Fa Fofana, Près de l’ex. Oumou-Sang (actuel Nissan Automobile)
Tél. (00 223) 20 24 11 22 * 66 78 21 11 * 71 00 30 00 * 76 37 82 46
Boite Postale 9155 Bamako Mali
Email : contact@expulsesmaliens.info
 Localisez-nous : Cliquez ici